சிரம்பான், பிப்.12-
நானோ அறிவியல், நானோ தொழில்நுட்பம் மற்றும் நானோ பொறியியல் துறைகளில் உலகளாவிய ஆராய்ச்சியாளர்கள் மற்றும் தொழில் வல்லுநர்களை ஒன்றிணைக்கும் 7-வது மலேசியா–ஜப்பான் அனைத்துலக மாநாடு (MJIC 2026), 2026 ஆம் ஆண்டு சிரம்பானில் அமைந்துள்ள ராயல் சுலான் ஹோட்டலில் நடைபெற்றது.
இம்மாநாடு நானோ அளவிலான அறிவியல் மற்றும் தொழில்நுட்ப முன்னேற்றங்களைப் பகிர்ந்து கொள்ளும் முக்கிய அனைத்துலக தளமாக விளங்குகிறது என்பது குறிப்பிடத்தக்கது.
MJIC 2026 மாநாட்டின் ஒரு பகுதியாக நடைபெற்ற புத்தாக்கப் போட்டியில், மாணவர்கள் உருவாக்கிய பல்வேறு சமூக மற்றும் தொழில்நுட்ப நோக்கமுடைய திட்டங்கள் பெரும் கவனம் பெற்றன. இதில் சிறந்த புதுமை திட்டங்களுக்கு தங்கம் மற்றும் வெள்ளிப் பதக்கங்கள் வழங்கப்பட்டன.
அவ்வகையில், ஏம்ஸ்ட் பல்கலைக்கழகத்தைச் சேர்ந்த பட்டதாரிகள் இதில் பங்கேற்று மொத்தம் ஆறு குழுக்கள் தங்கப்பதக்கங்களையும் வெள்ளி பதக்கத்தையும் வென்றுள்ளனர்.
அதிலும் குறிப்பாக, “HeatMateX” என்ற திட்டம் தங்கப் பதக்கம், இப்புத்தாக்கப் போட்டியின் சிறப்பு பரிசையும் வென்றது. இந்த திட்டத்தை Yogini A/P Malarvannan (தலைவர்), Kirshavina A/P Kumar, Yeoh Jia Ying, Wong Yu Jue, Gaytriambal A/P Sivakumar மற்றும் Voon Qian Hui ஆகியோர் உருவாக்கினர். அதோடு ஐந்து குழுக்கள் வெள்ளிப் பதக்கங்களையும் வென்றன.
இந்த மாநாட்டை மலேசியாவின் Universiti Teknologi MARA (UiTM) பல்கலைக்கழகத்தின் Institute of Science அமைப்பு ஏற்பாடு செய்தது. மேலும், UiTM-இன் Faculty of Applied Sciences, ஜப்பானின் Nagoya Institute of Technology, இந்தோனேசியாவின் Universitas Brawijaya, ஜப்பானின் National Institute of Technology Kagawa College மற்றும் Tokuyama College, மலேசியாவின் National Nanotechnology Centre (MOSTI) மற்றும் Malaysia Nanotechnology Association ஆகியவை இணைந்து மாநாட்டிற்கு ஆதரவு வழங்கின.
இந்த மாநாடு உலகளாவிய தொழில்நுட்ப மற்றும் பொருளாதார வளர்ச்சிக்கு துணைபுரியும் வகையில், ஆராய்ச்சி மற்றும் தொழில்துறை இடையிலான இணைப்பை வலுப்படுத்தும் முக்கிய நிகழ்வாக அமையும் என எதிர்பார்க்கப்படுகிறது.
0 Comments